Hirugarren gizona film bat izateko jaio zen, baina Graham Greenek aurretik istorioa idatzi beharra zuen, eta hartara bi arte-lan iritsi zitzaizkigun: filma eta eleberri laburra. Gerra bukatu berritan, Viena lau potentziek okupaturiko hiri erraustu eta porrokatua da, elurpeko miseriaren eta trafiko beltzaren gune. Hara iristen da Rollo Martins western idazlea, bere lagun Harry Limek gonbidaturik. Baina iritsi orduko Harryren hiletarekin egiten du topo; denak Vienatik alde egin dezan saiatuko dira, eta gero Harryren aztarrenak sumatuko ditu… Zinema teknikaz idatziriko eleberri honetan misterioa da nagusi, aurrera egin nahi eta zer gertatzen den jakiteko irrika; baina aldi berean gaiztakeriari buruzko gogoeta bat dago, eta egilearen kezka etiko hauek halako sakontasun bat ematen diote bere lanari.